SIÐAREGLUR

FÉLAGS SJÁLFSTÆTT STARFANDI SJÚKRAÞJÁLFARA 

1. gr.

Hlutverk sjúkraþjálfara

Hlutverk sjúkraþjálfara er að greina og meðhöndla truflun á hreyfingum líkamans, vinna að því að efla og viðhalda líkamlegu sem andlegu atgervi skjólstæðinga sinna og draga úr og koma í veg fyrir vanlíðan.

2. gr.

Skylda sjúkraþjálfara til að hafa hagsmuni skjólstæðings síns að leiðarljósi.

Sjúkraþjálfari skal bera hag skjólstæðings síns fyrir brjósti með því að veita bestu sjúkraþjálfun sem völ er á og vinna af heilindum í starfi sínu. Sjúkraþjálfari skal koma heiðarlega fram gagn­vart skjólstæðingi sínum og sýna honum og aðstandendum hans fyllstu virðingu.

Sjúkraþjálfari skal vinna fordómalaust og án þess að fara í manngreinarálit. Hann virðir mann­helgi skjólstæðings síns og sjálfsákvörðunarrétt.

Sjúkraþjálfari skal veita skjólstæðingi sínum upplýsingar um þau meðferðarúrræði sem honum standa til boða og kynna sér þau réttindi sem skjólstæðingurinn nýtur í því sambandi. Þá skal sjúkra­þjálfari veita skjólstæðingi sínum upplýsingar um viðskipti þeirra. 

3. gr.

Skylda sjúkraþjálfara til að fara ekki út fyrir starfsvið sitt.

Sjúkraþjálfari skal virða þá ábyrgð sem starfi hans fylgir og gæta að þeim takmörkunum sem menntun hans setur. Sjúkra­þjálfari skal ekki taka að sér skjólstæðing án samráðs við lækni, sbr. 5. gr. laga nr. 58/1976 um sjúkraþjálfun. Sjúkra­þjálfari skal ekki taka að sér skjólstæðing sem hann er ekki fær um að sinna vegna þess að hann skortir til þess þekkingu, svo sem vegna þess að hann hefur ekki sérfræðileyfi til að starfa á því sérsviði sjúkra­þjálfunar sem um ræðir, sbr. reglugerð nr. 145/2003 um veitingu sér­fræðileyfa í sjúkraþjálfun, eða vegna þess að skjólstæðingur hefur þörf fyrir önnur úrræði en felast í sjúkraþjálfun. Þegar svo stendur á skal sjúkraþjálfari vísa viðkomandi annað.

4. gr.

Þagnarskylda

Sjúkraþjálfari skal gæta þagmælsku um atriði er hann fær vitneskju um í starfi sínu, sbr. 9. gr. laga nr. 8/1976 um sjúkraþjálfun.

                                                                                        5. gr.

Skylda sjúkraþjálfara til að viðhalda þekkingu sinni, miðla henni til annarra.

Sjúkraþjálfari skal viðhalda þekkingu sinni og starfsfærni. Hann skal miðla af þekkingu sinni og reynslu til samstarfsfólks, nemenda í sjúkra­þjálfun og annarra sjúkraþjálfara. Hann skal jafnframt stuðla að þróun í sjúkraþjálfun og tileinka sér nýjungar sem að gagni koma á hans starfsvettvangi.

Sjúkraþjálfara ber að efla og bæta sjúkraþjálfun í þágu samfélagsins. Hann nýtir menntun sína og þekkingu þar sem hann telur að hún komi að gagni, og tekur þátt í stefnu­mótun innan heilbrigðis­þjónustunnar.

6. gr.

Skyldur sjúkraþjálfara gagnvart öðrum sjúkraþjálfurum og öðrum fagstéttum

Sjúkraþjálfari skal vera vandur að virðingu sinni. Hann skal hafa hugfast að orðspor stéttarinnar byggir á sérhverjum einstaklingi innan hennar. Sjúkraþjálfari skal virða störf annarra heilbrigðisstétta, og starfa af heilindum með samstarfs­fólki og öðrum heilbrigðisstéttum með velferð skjólstæðings síns að leiðarljósi.

                                                                                         7. gr.

Skyldur sjúkraþjálfara við kynningu á starfsemi sinni og vörum og þjónustu tengdri henni

Sjúkraþjálfara er heimilt að auglýsa starfsemi sína á málefnalegan hátt. Hann skal á engan hátt gefa í skyn faglega yfirburði sína umfram aðra sjúkraþjálfara í auglýsingum, greinum eða viðtölum í fjölmiðlum.

Umfjöllun sjúkraþjálfara um vöru og þjónustu skal vera fagleg. Hann skal forðast að halda fram yfirburðum einnar vöru eða þjónustu umfram aðra.

8. gr.

Tilkynningarskylda

Sjúkraþjálfara sem telur sig verða vitni að hæpnum, ámælisverðum eða ólöglegum starfsháttum í sjúkraþjálfun ber skylda til að bregðast við slíku. Hann skal í samræmi við alvöru ætlaðs brots snúa sér beint til gerandans, til yfirmanna hans, til siðanefndar FSSS og eða til lögreglu.

                                                                                          9. gr.

Úrskurðarnefnd

Skjólstæðingum þeirra sjúkraþjálfara sem eru félagar í Félagi sjálfstætt starfandi sjúkraþjálfara er heimilt að beina kvörtunum vegna starfa félagsmanna til úrskurðarnefndar um brot gegn siða­reglum félags­ins. Kvörtun skal vera skrifleg og beint til Félags sjálfstætt starfandi sjúkraþjálfara. Frestur til þess að kvarta er þrír mánuðir frá því að sú háttsemi eða atburðir sem um ræðir áttu sér stað.

Úrskurðarvald nefndarinnar tekur til þess að kveða á um það hvort félagsmaður hafi í starfi sínu brotið gegn ákvæðum siðareglnanna. Nefndin skal skipuð þremur félagsmönnum sem skulu kosnir til þriggja ára í senn á aðalfundi félagsins. Kjósa skal þrjá aðalmenn og jafnmarga til vara. Nefndinni er heimilt að leita sér utanaðkomandi aðstoðar, svo sem lögmanns, vegna einstakra mála.

Áður en úrskurðarnefndin kveður upp úrskurð í tilefni af kvörtun skjólstæðings er skylt að gera viðkomandi sjúkraþjálfara grein fyrir kvörtunarefninu og leita eftir athugasemdum hans.

Úrskurðir nefndarinnar skulu vera rökstuddir. Í rökstuðningi skal meðal annars rekja málavexti og kveða á um við hvaða ákvæði siðareglnanna og með hvaða hætti félagsmaður hafi gerst brotlegur.